شاندێکی وەزارەتی داد سەردانی فەرمانگەی پەیوەندییەکانی دەرەوەی هەرێمی کوردستانی کرد

17 تشرين1/أكتوير 2019

 

رۆژی ١٧-١٠-٢٠١٩ دادوەر/ عەبدولڕەحمان حەمەکەریم، بەڕێوبەری گشتی داد بە سەرۆکایەتی شاندێکی وەزارەتی داد، سەردانی فەرمانگەی پەیوەندییەکانی دەرەوەی حکومەتی هەرێمی کوردستانی کرد و لەگەڵ سەفین دزەیی بەرپرسی فەرمانگەی پەیوەندییەکانی دەرەوە کۆبوونەوە . 

وێڕای پیرۆزباییکردن لە سەفین دزەیی و خواستنی هیوای سەرکەوتن لە پۆستە نوێیەکەیدا بەڕێوبەری گشتی داد بە وردیی باسی لە چۆنێتی بەرەوپێشبردنی کارە هاوبەشەکانی نێوان وەزارەتی داد و فەرمانگەی پەیوەندییەکانی دەرەوەی کرد و لەوبارەیەوە ژمارەیەک پێشنیازی خستەڕوو بۆ ئەوەی بەهەردوولا بتوانن باشترین و زۆرترین خزمەت بە هاووڵاتیانی هەرێمی کوردستان لە ناوخۆ و دەرەوەی هەرێمی کوردستان بگەیەنن، بە تایبەتی ئەو هاوڵاتیانەی کە بەمەبەستی پەسەند کردن و پشتڕاستکردنەوەی بەڵگەنامە فەرمییەکانیان لە دەرەوە و ناوەوەی هەرێمەوە، سەردانی وەزارەتی داد و فەرمانگەی پەیوەندییەکانی دەرەوەی هەرێمی کوردستان دەکەن . 

هەرلەو کۆبوونەوەیەدا دووپات لەوە کرایەوە کە پشتڕاستکردنەوەی ئەو بەڵگەنامانە کارێکی گرنگ و هەستیارە، چونکە پەیوەستە بە پاراستن و زامنکردنی سەروماڵی هاوڵاتیان و ئاسانکارییە بۆ ئیشوکاری ئەو هاوڵاتییە کوردستانیانەی کە لە تاراوگە دا دەژین هەربۆیە خزمەتکردنی ئەوان هۆکارە بۆ پابەندبوونی زیاتری ئەوان بە خاک و وڵاتی خۆیانەوە . 

سەفین دزەیی بەرپرسی فەرمانگەی پەیوەندییەکانی دەرەوەی هەرێمی کوردستان لەلای خۆیەوە ستایشی کارەکانی هەردوو تیمی کرد و لەوبارەیەوە رایگەیاند بەمەبەستی زیاتر خزمەتکردنی هاوولاتیان، خوازیاری ئەوەن کەڵک لە ئەزموون و شارەزایی یاسایی و قەزایی فەرمانبەرانی وەزارەتی داد وەربگرن و دووپاتی لەوە کردەوە کە بۆ رێگرتن لەهەر هەوڵێکی تەزویرکردن و پێشکەشکردنی بەڵگەنامەی ساختە، ئامادەیی هەموو هاوکارییەکن لەگەڵ وەزارەتی داد، بەتایبەتی بەڕێوبەرایەتی پەیوەندییە یاساییەکانی وەزارەتی داد . 

هەروەها رایگەیاند بەکەڵک وەرگرتن لە بەرەوپێشچوونی پەیوەندییەکانی نێوان هەولێرو بەخدا، فەرمانگەی پەیوەندییەکانی دەرەوەی هەرێم لە هەوڵی ئەوەدایە کە هەموو ئەو مافە دەستووریی و یاساییانەی خۆی بەدەست بهێنێت کە لە بواری دیبلۆماسێت و پەیوەندییەکانی دەرەوەدا، دەستوور زامنی کردوە و لەوبارەیەوە چەندین پرۆژە و هەنگاوی نوێیان بەدەستەوەیە . 

شیاوی باسە مافپەروەران عەبدولڕەزاق جەلال تەها، بەڕێوبەری پەیوەندییە یاساییەکان و نەریمان تاڵیب، وتەبێژی وەزارەتی داد، ئامادەی دیدار و سەردانەکە بوون . 

ناونیشان

ناونیشان: هەرێمی کوردستان-هەولێر

‌چواڕیانی فرنسوا میتران

 سۆسیال میدیا

پەیوەندی کردن

بۆ وەڵامدانەوەی پرسیارەکانتان سەبارەت بە هەر کارێکی پەیوەست بە وەزارەتی داد یا هەر فەرمانگەیەکی تری سەر بە وەزارەت دەتوانن پرسیارو داواکاری و سکاڵاکانتان لە رێگەی ئەم فۆرمەوە بنێرن

: iraq, irbil
: 2245580 - 2245507 - 2245506
  نامەکەت نەگەیشت.   نامەکەتە بەسەرکەوتووی گەیشت.
Top